La semaine du kréol la rivé, arriv azot aster !
Kan Antenne Réunion la invit amoin pou koz dann télé in zédi soir, zamé moin noré di le kozman noré pran le tournéviré li la pran. Momandoné i demann amoin kèl mo oubiensa kèl zésprésion mi yinm. Amoin mi sava si in nanir di « bienvenu » an kréol, in manir akèy tout bann kréol i artourn La Rénion kisoi pou artrouv zot famiy (bann touris afinitèr) oubiensa anou minm kan nou artourn la kaz apré bann vakans péi deor. Zot i koné, anou Kréol kan nou lé déor, an zénéral nout péi sa i mank anou vitman. Alors, tèl i komans oir bann piton kan lavion i vir dann sièl, nout kontantman i komans. Kan nou ariv Gillot, lé konmsi nou ariv la kaz. In « Ariv aou », « Rant aou », baro lé rouvèr, sré in lakèy dan nout lang, pa pou ranplas lézot lang, non va, riyink koté tout bann lang, pa plis, pa moin. E la, koméla, kan nou ariv Gillot, nou oi in gran pano, èk in takon, in voyaz, in tralé lang pou akèy demoun, soman pou nou, zéro kalbas … Biensir nou konpran le « Bienvenu » an fransé oubien dan dot lang. Biensir, nou lé biling. Le mank lé pa dan la kominikasion, le mank lé dan le sinbolik.
Fin oktob 2021, 200 moun i sava débark Gillot pou sobat dan bann Etats Généraux du Multilinguisme dans les Outre-mer. Kosa bana i sar oir tèl zot i ariv Gillot : La Rénion i mèt pa anlèr son lang ! Regrétan ! Alors, alon ansanm pous plis loin astèr. Nout lang, sa pa ryink pou kozé oubien pou fé le folklor. Alors, alon fèr ! Alon kozé ! Alon propozé, san kasé brizé. An moun résponsab é afirmé. Kosa, tipa tipa, aou, amoin, nou sré kapab afirmé an kréol ? Ziska ousa nou sré paré pou alé ? Alon kozé trankilman, èk réspé, sanm bann zargiman konmkifo. Alé, alon fèr, ansanm, mon bann. Ariv azot astèr !
